A duk lokacin da aka ce sanyi ya durfafo, da yawan mutane kan fara fargabar yadda fatar jikinsu ko wasu sassan jikin kan yamushe saboda yanayin iskar hunturun. Hakan ta sa sai a fara tunanin me ya kamata a shafa don kaucewa hakan.
Ga shi kuma a daidai lokacin da sanyi ke kunno kai a ƙarshen shekara a wannan yanki na Afirka irin su Najeriya, a lokacin ne aka fi yin bukukuwa, mata kuwa sun fi kowa ado da kwalliya lokacin biki, amma kwalliya ba lallai ta yi kyau ba idan har jiki ya bubbushe.
A wannan maƙala, mun yi duba ne kan matakan da za ku bi don inganta kyawun fatarku, da ƙafa wacce ke yin kaushi ko faso lokacin sanyi, da gashi da ke karyewa a yanayi da kuma leɓe da ke yawan bushewa.
Mun yi hira da wata ƙwararriya Maryam Muhammad kan abin da ya shafi alkinta jiki sanin yanayin kowace fata da abin da ya kamata a yi mata.
Fatar jiki ita ta fi komai girma a jikin mutum, sannan ita ce ke fara bayyana da an hango mutum. A lokacin sanyi takan bushe ta yi fururu, musamman dai idan ba a kula da ita yadda ya kamata.
Karanta>>> Hanyoyin Da Zaku Bi Domin Karin Kiba Ba Tare Da Kunsha Maganin ba
Akwai hanyoyin kula da fata sosai da suka haɗa da:
Kar a yi wanka da ruwa mai tsananin zafi: Haƙiƙa an san cewa yin wanka da ruwan sanyi ba abu ne mai yiwuwa ba ga mafi yawan mutane a lokacin hunturu, sai dai kuma shi kansa yin wanka da ruwa mai zafi sosai ba zai taimaka ba a wannan yanayi don zafinsa na iya yin tasiri sosai a kan fatar.
An fi so a yi wanka da ruwa mai ɗumi kawai a yadda bai yi sanyi da zai sa kaɗuwa ba, sannan bai yi tsananin zafin da zai kashe fatar ba. Ruwan zafi sosai na kashe fatar jiki.
Yawan shafa mai: A irin wannan yanayi an so da zarar mutum ya gama wanka tun kafin ya tsane to ya shafa mai a illahirin jikinsa tun daga banɗaki. Sannan ana so cikin mayukan ya kasance akwai mai ɗan ruwa-ruwa da ake kira lotion sai a cakuɗa da mai maiƙo a shafe a jikin.
Mayuka irin su man kaɗanya da man kwakwa da zaitun na matuƙar taimakawa a irin wannan yanayi.
A dinga shan ruwa sosai: Mutane da dama suna tunanin kamar a lokacin zafi ne kawai aka fi buƙatar shan ruwa sosai. Sai dai masana lafiya sun ce a lokacin sanyi ma ana so a yawaita shan ruwa saboda yana taimakawa wajen ƙara ingancin fatar jiki da hana ta bushewa.
Cin ganyayyaki da ƴaƴan itace: Sannan Maryam Muhammad ta ba da shawarar yawan cin abincin da ya danganci ganyayyaki da kayan marmari. Kamar su dankalin Hausa da karas da gurgi da lemo da sauran su.
Hanya ta gargajiya: Akwai wasu dabaru da za ku iya bi don inganta kyawun fatar jikinku. Daga ciki akwai yin Halawa da dilka, wani salo da ya samo asali daga Larabawan Sudan da ƴan Chadi.
Ana dafa sikari ne sosai a zuba wasu sinarai sai a dinga sawa a jikin mutum ana cire gashi da duk dattin da ya maƙale a fatar. Sannan a mulke jikin da sinadarin dilke ɗin a yi ta bi ana murzawa na wani ɗan lokaci.
“Sannan akwai turara jiki ta hanyar zuba ruwan zafi a bokiti sai a lullube jiki tare da bokitin don jikin ya turara. Amma a kula kar a bari ruwan ya zube ya ƙona ku,” in ji Maryam.
“Wallahi idan na yi halawa da dilka a lokacin sanyi ba na gajiya da kallon jikina saboda irin kyan da yake yi, kuma sam ba ya yin wannan bususun na hunturu,” a cewar Hafsah Abubakar, wata ma’abociyar yin wannan aladar.
Ƙafafu
Ƙafa wata muhimmiyar ɓangare ce ta jiki da take buƙatar a dinga kula da ita sosai, musamman a lokuta irin sanyi.
Ita ma wata mai harkokin kula da jiki Jawahir Isma’il ta ba da shawara cewa a dinga haɗa ruwan ɗumi ba mai zafi sosai ba sai a zuba ruwan kal wato vinegar kaɗan da ɗan gisgiri, a tsoma ƙafa a ciki ta yi kamar minti 30 ko zuwa lokacin da ruwan zai huce, sannan sai a wanke ta tas da dutse goge ƙafa, ko kuma abin goge ƙafa na zamani.
Sannan ta ce: “A dinga wanke ƙafar akai-akai ana kuma shafe ta da mai musamman ma na kaɗanya da zarar an gama wanke ta.
“A kuma dinga saka safa sosai a ƙafar don kaucewa kwasar ƙura ko datti ta yadda za su haifar da faso ko kaushi. Sannan a tabbatar ko a gida ne ana yawo da takalmi.”
Gashi
Shi ma gashi kamar yadda aka sani ya fi buƙatar kulawa sosai lokacin sanyi.
Don haka ƙwararrun suka ce:
- A dinga yawan shafa masa mai da kuma rufe shi.
- Idan da hali a dinga zama da kitso maimakon barin sa a tsefe.
- A dinga shan ruwa sosai don yana kare gashi daga karyewa.
- Idan da hali a dinga yin abin da ake kira steaming, wato turara gashin makar bayan duk mako biyu.
Leɓe
Shi ma leɓe muhimmin waje ne da ke son kulawa ta musamman a lokacin sanyi. Jawahir ta ce yana da kyau a dinga yawan shafa man baki a leɓen saboda gudun bushewarsa.
“Idan leɓe ya bushe a lokacin sanyi har wani daddare za ga yana yi yana jini. Sannan ya kamata kuma a dinga shafa masa man baki da daddare idan za a kwanta barci,” in ji ta.